អាជ្ញាធរខេត្តកណ្តាល ស្នើរដ្ឋាករទឹកស្វយ័តក្រុងភ្នំពេញ ជួយបំពេញបន្ថែមការផ្គត់ផ្គង់ទឹកនៅក្រុងតាខ្មៅ ដើម្បីធានាការប្រើប្រាស់ អោយបានគ្រប់គ្រាន់

ខេត្តកណ្ដាល៖ ក្នុងជំនួបពិភាក្សាការងារជាមួយឯកឧត្តម ឡុងណារ៉ូ អគ្គនាយករដ្ឋាករទឹកស្វយ័ក្រុងភ្នំពេញ នៅសាលាខេត្ត កណ្តាល នាព្រឹកថ្ងៃទី០២ ខែវិច្ឆិកា ឆ្នាំ២០២១នេះ ឯកឧត្តម គង់ សោភ័ណ្ឌ អភិបាលខេត្តកណ្ដាល បានស្នើរដ្ឋាករទឹកស្វយ័តក្រុងភ្នំពេញ ជួយបំពេញបន្ថែម ដល់ការផ្គត់ផ្គង់ទឹក ដើម្បី ធានាការប្រើប្រាស់គ្រប់គ្រាន់ និងមាននិរន្តភាព នៅទូទាំងក្រុងតាខ្មៅ។

ឯកឧត្តមអភិបាលខេត្ត បន្តថា៖ ក្រុងតាខ្មៅមានសង្កាត់ចំនួន៤ ដែលទើបកាត់មកពីស្រុកស្អាង នៅមិនទាន់មានទឹកប្រើប្រាស់គ្រប់គ្រាន់នៅឡើយទេ ដូច្នេះ ស្នើរដ្ឋាករទឹកស្វយ័តក្រុងភ្នំពេញ ជួយពន្លឿនការសិក្សាបន្ថែម និងរិះរកដំណោះស្រាយ ធ្វើយ៉ាងណាផ្គត់ផ្គង់ទឹក ឱ្យប្រជាពលរដ្ឋ នៅសង្កាត់ចំនួន៤ ដែលទើបកាត់ចេញពីស្រុកស្អាងមានទឹកប្រើប្រាស់គ្រប់គ្រាន់។

ជាការឆ្លើយតប ឯកឧត្តម ឡុង ណារ៉ូ បានជម្រាបជូន ឯកឧត្ដម អភិបាលខេត្តពីគម្រោងការផ្គត់ផ្គង់ទឹក សំរាប់ទូទាំងក្រុងតាខ្មៅ ដោយឯកឧត្តម បានលើកឡើងថា៖ នៅក្នុងឆ្នាំ២០២៤ ខាងមុខនេះ រដ្ឋាករទឹកស្វយ័តភ្នំពេញ នឹងអាចផលិតទឹកបាន ៣ម៉ឺនម៉ែត្រគីបបន្ថែមទៀត សម្រាប់ប្រើប្រាស់នៅក្រុងតាខ្មៅ និងនៅឆ្នាំ២០៣០ គ្រោងនឹងបង្កើតរោងចក្រផលិតទឹកមួយ នៅក្រុងតាខ្មៅ ដែលមានអនុភាពផលិតបាន ៦ម៉ឺនម៉ែត្រគីប អាចផ្គត់ផ្គង់បាននៅទូទាំងក្រុងតាខ្មៅ និងប្រើប្រាស់ទឹកបានគ្រប់គ្រាន់ នៅក្នុងព្រលានយន្តហោះអន្តរជាតិភ្នំពេញថ្មី។

ទន្ទឹមនឹងនោះ ឯកឧត្តម អគ្គនាយក ក៏បានជម្រាបពីគម្រោងបន្ថែម ក្នុងការពង្រីកវិសាលភាពរបស់ខ្លួន សម្រាប់ភូមិសាស្រ្តខេត្តដែលជាប់ព្រំប្រទល់រាជធានីភ្នំពេញ ឱ្យមានទឹកប្រើប្រាស់គ្រប់គ្រាន់ និងមានតម្លៃសមស្របដូចគ្នាដែរ។

គួររំលឹកថា៖កន្លងមកនេះ រដ្ឋាករទឹកស្វយ័តក្រុងភ្នំពេញ បានដាក់ពង្រាយទុយោទឹករបស់ខ្លួន មានទំហំ ៦០សង់ទីម៉ែត្រ ឆ្ពោះមកក្រុងតាខ្មៅ នៅត្រង់ផ្លូវជាតិលេខ២១ និងផ្លូវជាតិលេខ ២ ឆ្ពោះទៅសង្កាត់ព្រែកហូរ ។

ជាមួយគ្នានេះ ឯកឧត្ដម អគ្គនាយករដ្ឋាករទឹកស្វយ័ក្រុងភ្នំពេញ ក៍បាននាំយកម៉ាសចំនួន១ម៉ឺនម៉ាស និងអាកុល ១០កាន សំរាប់រួមចំណែកក្នុងការ ប្រយុទ្ធប្រឆាំង ជម្ងឺ កូវិដ១៩ ក្នុងភូមិសាស្ត្ររដ្ឋបាលខេត្តកណ្តាលផងដែរ៕ ដោយ៖ មន្ទីរព័ត៌មានខេត្តកណ្តាល សម្រួលផ្សាយដោយ៖ ធូ​ កុសល

សូមអានបន្ត

ខេត្តកំពតរៀបចំពិធីបិទយុទ្ធនាការចាក់វ៉ាក់សាំការពារជំងឺកូវីដ-១៩ ជូនប្រជាពលរដ្ឋចាប់ពីអាយុ១៨ឆ្នាំឡើង

កំពត៖ ថ្ងៃព្រហស្បតិ៍ត ១៥កើត ខែអស្សុជ ឆ្នាំ ឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃ ទី២១ ខែតុលា ឆ្នាំ ២០២១ នៅសាលាខេត្តកំពត ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត និងឯកឧត្តម ជឹង ផល្លា ប្រធានក្រុមប្រឹក្សាខេត្ត រួមជាមួយឯកឧត្តម លោកជំទាវ អភិបាលរងខេត្ត លោកស្នងការ លោកមេបញ្ជាការកងកម្លាំងទាំងបីប្រភេទ លោក លោកស្រីនាយក នាយករងរដ្ឋបាលសាលាខេត្ត លោក លោកស្រីប្រធានមន្ទីរ អង្គភាពជុំវិញខេត្ត លោក លោកស្រីអភិបាលក្រុង ស្រុក លោក លោកស្រីនាយក នាយករងទីចាត់ការ ប្រធាន អនុប្រធានអង្គភាព និងមន្ត្រីរាជការចំណុះសាលាខេត្ត បានចូលរួមពិធីពិធីបិទយុទ្ធនាការចាក់វ៉ាក់សាំងការពារជំងឺកូវីដ-១៩ ជូនប្រជាពលរដ្ឋចាប់ពីអាយុ១៨ឆ្នាំឡើង ក្រោមអធិបតីភាពលោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស។

តាមរបាយការណ៍របស់ ឯកឧត្តម វេជ្ជបណ្ឌិត ញា ប៊ុនថន ប្រធានមន្ទីរសុខាភិបាលខេត្ត បានឲ្យដឹងថា គិតត្រឹមថ្ងៃទី១៧ ខែតុលា ឆ្នាំ២០២១ ការចាក់វ៉ាក់សាំងដូសទី១ សម្រេចបានដូចខាងក្រោម៖

-ប្រជាពលរដ្ឋដែលមានអាយុចាប់ពី១៨ឆ្នាំឡើង ចាក់វាក់សាំបានចំនួន ៣៤៤,៧៦៣នាក់ ស្មើ ៨៩.០៩ភាគរយ នៃ ផែនការសរុប៣៨៦,៩៤៨នាក់ ។ ក្នុងនោះពុំទាន់បានចាក់ចំនួន ៤២,១៨៥នាក់ ស្មើ ១០.៩១ភាគរយ ។

-កុមារ និងយុវវ័យ អាយុចាប់ពី១២ឆ្នាំ ដល់ក្រោម១៨ឆ្នាំ ចាក់បានចំនួន៦៦,១០៩នាក់ ស្មើ ៨៤.០០ភាគរយ នៃផែនការសរុប៧៨,៧០០នាក់ ។ ក្នុងនោះអ្នកមិនទាន់បានចាក់ ចំនួន១២,៥៩១នាក់ ស្មើ ១៦.០០ភាគរយ ។

-កុមារ អាយុចាប់ពី៦ឆ្នាំ ដល់ក្រោម១២ឆ្នាំ ចាក់បាន ចំនួន៧៧,២០៥នាក់ ស្មើ ១១០.៨២ភាគរយ នៃផែនការ សរុប៦៩៦៦៨នាក់ ។ លើសផែនការ ចំនួន ៧៥៣៧ នាក់ ស្មើ ១០.៨២ភាគរយ ។

-ជារួមប្រជាជនអាយុចាប់ពី១២ឆ្នាំឡើង បានចាក់វ៉ាក់សាំងដូសទី១រួច ចំនួន៤១០,៨៧២នាក់ ស្មើ៨៨.២៤ភាគ រយ នៃផែនការសរុប៤៦៥,៦៤៨ នាក់ ក្នុងនោះអ្នកពុំទាន់ បានចាក់ចំនួន៥៤,៧៧៦នាក់ ស្មើ១១.៧៦ភាគរយ (ស្ត្រីមានផ្ទៃពោះ ពលករចំណាកស្រុក ប្រជាពលរដ្ឋមានធុរៈផ្សេងៗ ក្នុងពេលយុទ្ធនាការ និងអ្នកជំងឺដែលមិនអាចចាក់បាន) ។

មានប្រសាសន៍ក្នុងឱកាសនោះ លោកជំទាវ ឱ វណ្ណឌីន បានបញ្ជាក់ថា ក្រោមការយកចិត្តទុកដាក់ខ្ពស់បំផុតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានស្វះស្វែងរកវ៉ាក់សាំងមកចាក់ជូនប្រជាពលរដ្ឋដោយឥតគិតថ្លៃ រហូតក្លាយជាប្រទេសឈានមុខ លើការចាក់វ៉ាក់សាំងជូនប្រជាពលរដ្ឋបានច្រើនជាងគេ។ ជាមួយលទ្ធផលចាក់វ៉ាក់សាំងគួរជាទីមោទននេះ យើងក៏មិនត្រូវភ្លេចអំពីការអនុវត្តតាមវិធានសុខាភិបាលនានា ព្រោះថាវ៉ាក់សាំងអាចជួយកាត់បន្ថយភាពធ្ងន់ធ្ងរនៃជំងឺ ការចូលសំរាកមន្ទីរពេទ្យ និងអត្រាមរណៈភាព ប៉ុន្តែមេរោគកូវីដ ១៩ ដ៏កាចសាហាវនេះ នៅតែមានឱកាសឆ្លងចូលមកក្នុងខ្លួនយើង ហើយយើងក៏អាចជាភ្នាក់ងារចម្លងមេរោគនេះទៅអ្នកដទៃ និងមនុស្សជុំវិញខ្លួន ។

ក្នុងឱកាសនោះលោកជំទាវបានអំពាវនាវដល់ប្រជាពលរដ្ឋទាំងអស់ សូមយកចិត្តទុកដាក់អនុវត្តតាមប្រសាសន៍ណែនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺអនុវត្តវិធាន៣ការពារ និង៣កុំ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ដ៏កាចសាហាវនេះ។ ជាកិច្ចបញ្ចប់លោកជំទាវបានប្រកាសបិទយុទ្ធនាការចាក់វ៉ាក់សាំងកូវីដ-១៩ ជូនប្រជាពលរដ្ឋដែលមានអាយុចាប់ពី១៨ឆ្នាំឡើង និងប្រកាសបិទការផ្តល់ថវិកាជូនដល់ប្រជាពលរដ្ឋដែលមានអាយុពី១០០ឆ្នាំឡើងទៅក្នុងខេត្តកំពតចាប់ពីថ្ងៃនេះតទៅដែរ៕ ដោយ៖ មន្ទីរព័ត៌មានខេត្តកំពត សម្រួលផ្សាយដោយ៖ dara

សូមអានបន្ត

គ្រឹះស្ថានសិក្សារដ្ឋ កម្រិតមធ្យមជាង ៤០សាលានៅខេត្តសៀមរាប បានបើកដំណើរការសាកល្បងហើយនៅថ្ងៃទី១៨ ខែតុលានេះ !

   

សៀមរាប៖ នៅព្រឹកថ្ងៃទី១៨ ខែតុលា ឆ្នាំ២០២១នេះ គ្រឹះស្ថានសិក្សារដ្ឋ កម្រិតមធ្យមសិក្សាចំនួន៤៤សាលា នៅក្នុងស្រុកចំនួន៨ នៃខេត្តសៀមរាប ដែលបានដាក់ពាក្យស្នើសុំកន្លងមក រួមមាន ៖ ១. ស្រុកបន្ទាយស្រី , ២. ស្រុកស្វាយលើ , ៣. ស្រុកសូទ្រនិគម , ៤. ស្រុកប្រាសាទបាគង , ៥. ស្រុកស្រីស្នំ , ៦. ស្រុកវ៉ារិន , ៧. ស្រុកអង្គរធំ និង ៨. ស្រុកក្រឡាញ់ បានបើកដំណើរការឲ្យបង្រៀន និងរៀនសាកល្បងជាផ្លូវការហើយ ខណ:សាលាកម្រិតបឋមសិក្សាចំនួន ១២៩សាលា គ្រោងនឹងបើកដំណើរការសាកល្បងនៅថ្ងៃទី២០ ខែតុលាខាងមុខនេះដែរ។

លោក ពៅ ពិសិដ្ឋ អភិបាលរងខេត្ត និង ជាអនុប្រធានប្រចាំការ នៃគណ:កម្មការត្រួតពិនិត្យ និងវាយតម្លៃការបើកដំណើរការឡើងវិញនូវគ្រឹះស្ថានសិក្សាសាធារណ: និងឯកជនខេត្ត បានមានប្រសាសន៍ថា អនុវត្តតាមអនុសាសន៍ដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងតាមលិខិតរបស់ក្រសួងអប់រំ យុវជន និងកីឡា ដែលបានជម្រាបដល់រដ្ឋបាលរាជធានី និងខេត្តទាំងអស់ ឲ្យធ្វើការពិចារណា និងគិតគូរឲ្យបានហ្មត់ចត់ ក្នុងការបើកដំណើរការ។ រដ្ឋបាលខេត្តសៀមរាប បានសម្រេចបង្កើតគណ:កម្មការត្រួតពិនិត្យ និង វាយតម្លែការបើកដំណើរការឡើងវិញ នូវគ្រឹះស្ថានសិក្សាសាធារណ: និងឯកជន ក្នុងភូមិសាស្ត្រខេត្តសៀមរាប ដែលមានឯកឧត្ដម ទៀ សីហា អភិបាលខេត្ត ជាប្រធាន និង មានឯកឧត្ដម លោក លោកស្រី ជាអភិបាលរងខេត្ត សហភាពសហព័ន្ធយុវជនកម្ពុជាខេត្ត ថា្នក់ដឹកនាំមន្ទីរ អង្គភាពនានាក្នុងខេត្ត និង អភិបាលក្រុង ស្រុកក្នុងទូទាំងខេត្ត ជាអនុប្រធាន និងសមាជិក នៃគណ:កម្មការនេះ ។

លោក ពៅ ពិសិដ្ឋ មានប្រសាសន៍ទៀតថា មុននឹងយើងបើកសាលារៀនវិញនៅថ្ងៃនេះ យើងបានឆ្លងកាត់នូវដំណាក់កាល នៃការត្រួតពិនិត្យ និងវាយតម្លៃច្រើនករណីណាស់ គឺ ៖ ១. បើកនៅតាមសាលា នៃបណ្ដាស្រុក ដែលមានហានិភ័យទាប ដោយអនុវត្តការរៀនតាមបណ្ដុំ មិនលើសពី១៥នាក់ តាមស្តង់ដាប្រតិបត្តិការក្រសួងអប់រំ យុវជន និងកីឡា និង ក្រសួងសុខាភិបាល និងផ្ដល់អាទិភាពដល់សិស្សថ្នាក់ទី៩ និងទី១២ សម្រាប់តំបន់មានហានិភ័យមធ្យម , ២.ពិនិត្យលទ្ធភាពលោកគ្រូ អ្នកគ្រូ និងសិស្សានុសិស្សទាំងអស់ត្រូវតែបានចាក់វ៉ាក់សាំងទាំងពីរដូសគ្រប់ៗគ្នា និង ៣.ការចុះត្រួតពិនិត្យនៅតាមទីតាំងសាលារៀន នៃស្រុកមួយចំនួន ដែលបានដាក់ពាក្យស្នើសុំ ស្របទៅតាមគោលការណ៍ SOP របស់ក្រសួងអប់រំ យុវជន និងកីឡា ដូចជាសាលាត្រូវមានទីកន្លែងសម្រាប់លាងដៃនឹងសាប៊ូ លាងដៃ និងអាល់កុល ការត្រួតពិនិត្យកម្ដៅ និងសិស្សានុសិស្សត្រូវពាក់ម៉ាស់គ្រប់ៗគ្នា និងគ្រប់ពេលវេលា។

លោក លី ប៊ុនណា ប្រធានមន្ទីរអប់រំ យុវជន និងកីឡាខេត្តសៀមរាប បានមានប្រសាសន៍ថា ខេត្តសៀមរាបកន្លងមកនេះ បើទោះជាការបង្រៀន និងរៀនតាមបណ្តុំមិនទាន់បានដំណើរការក្តី ក៏ប៉ុន្តែការបង្រៀន និងរៀនពីចម្ងាយ ត្រូវបានអនុវត្តតាមការណែនាំរបស់ក្រសួងទាំងនៅទីក្រុង ទីប្រជុំជន និងនៅទីជនបទ ដោយបានរៀបចំឲ្យមានក្នុងរូបភាពចម្រុះ ជាបណ្តុំតាមសហគមន៍ ដែលធ្វើឲ្យកិច្ចការទាំងនេះ បានបង្កើតឲ្យមានបទជាពិសោធន៍ផងដែរ ដូច្នេះការបើកសាលារៀនឡើងវិញនៅថ្ងៃនេះ មានវិទ្យាល័យចំនួន ១៤កន្លែង និងអនុវិទ្យាល័យចំនួន ៣០កន្លែង ដែលក្នុងថ្នាក់រៀននីមួយៗ មានសិស្សមិនលើសពីចំនួន១៥នាក់ ហើយលក្ខខ័ណ្ឌឬវិធានការសម្រាប់ដំណើរការបើកសាលារៀនឡើងវិញនោះគឺ គណ:កម្មការ ឬអាជ្ញាធរមូលដ្ឋាន ដែលមានការចូលរួមពីគ្រប់អ្នកពាក់ព័ន្ធនោះគឺត្រូវតែពិនិត្យស្ថានភាពតំបន់ ។

លោក លី ប៊ុនណា មានប្រសាសន៍បន្ថែមថា ការបើកសាលាបង្រៀនសិស្សឡើងវិញនេះ វាមិនមែនជាព្រឹត្តិការណ៍ ឬជាការងារថ្មីនោះទេ ខណ:ការណែនាំរបស់ក្រសួងអប់រំ យុវជន និងកីឡា កាលពីដើមខែកញ្ញា ឆ្នាំ២០២០ នៅជាធរមាននៅឡើយ ព្រមជាមួយនឹងការណែនាំបន្ថែមស្តីពីស្តង់ដាអនាម័យ ការអនុវត្តវិធានការ ៣ការពារ ៣កុំ ការចាក់វ៉ាក់សាំងបង្ការសម្រាប់សិស្ស និងបុគ្គលិកអប់រំ និងគ្រូ ត្រូវធ្វើតេស្តសំណាក មុនបើកសាលាបង្រៀនសិស្ស ជាដើម ហើយដើម្បីឲ្យដំណើរការសិក្សានេះ ប្រកបដោយភាពរលូននោះ ការចូលរួមរបស់មាតាបិតា ឬអាណាព្យាបាលរបស់សិស្ស ក្នុងការត្រួតពិនិត្យសុខភាព និងសកម្មភាពរបស់កូនខ្លួនឯង គឺជាផ្នែកមួយដែលមានសារ:សំខាន់ជាទីបំផុត ។

សូមបញ្ជាក់ថា ក្នុងទូទាំងខេត្តសៀមរាប មានសាលាមត្តេយ្យសិក្សាចំនួន ២០កន្លែង និងមានថ្នាក់មត្តេយ្យសិក្សាផ្សេងទៀតដែលស្ថិតក្នុងសាលាបឋមសិក្សាចំនួនជាង ៤០០ កន្លែង , សាលាបឋមសិក្សាចំនួនជាង ៥១៤ កន្លែង , មានអនុវិទ្យាល័យ ចំនួន ៨២កន្លែង និងមានវិទ្យាល័យ ចំនួន ៤១កន្លែង ៕ ដោយ៖ មន្ទីរព័ត៌មានខេត្តសៀមរាប សម្រួលផ្សាយដោយ៖ dara

សូមអានបន្ត

សម្ដេចតេជោ ហ៊ុន សែន ថ្វាយព្រះរាជកុសលព្រះវិញ្ញាណក្ខន្ធ ព្រះករុណា ព្រះបាទសម្ដេចព្រះនរោត្ដម សីហនុ ព្រះបរមរតនកោដ្ឋ

 

ភ្នំពេញ: ថ្ងៃទី១៥ ខែតុលា ឆ្នាំ២០២១ ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានថ្វាយព្រះរាជកុសល ក្នុងឱកាសគម្រប់ខួប៩ឆ្នាំ (១៥ តុលា ២០១២ - ១៥ តុលា ២០២១) នៃការយាងសោយព្រះទិវង្គត នៃព្រះករុណាព្រះបាទសម្ដេចព្រះ នរោត្ដម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ»។

នៅលើផេកផ្លូវការនាព្រឹកថ្ងៃទី១៥ ខែតុលា ឆ្នាំ២០២១ សម្ដេចតេជោបានសរសេរថា ថ្ងៃទី១៥ ខែតុលា ឆ្នាំ២០២១នេះ គឺជាថ្ងៃគម្រប់ខួប ៩ឆ្នាំ ដែលសម្តេចឪ សម្តេចតា សម្តេចតាទួត ព្រះបិតាឯករាជ្យជាតិខ្មែរ ព្រះបាទសម្តេចព្រះ នរោត្ដម សីហនុ ព្រះអង្គបានសោយទិវង្គត នៅទីក្រុងប៉េកាំងប្រទេសចិន។

សម្ដេចតេជោបន្តថា «នៅថ្ងៃនេះ ប្រជារាស្រ្តទូទាំងប្រទេស ព្រមទាំងមន្ត្រីរាជការ កងកម្លាំងប្រដាប់អាវុធគ្រប់ជាន់ថ្នាក់ សូមសម្តែងនូវការគោរពដឹងគុណដ៏ខ្ពង់ខ្ពស់បំផុតថ្វាយចំពោះ ព្រះបរមរតនកោដ្ឋ ដែលព្រះអង្គបានលះបង់ និងបូជាព្រះកាយពលដ៏ធំធេងបំផុតចំពោះជាតិមាតុភូមិកម្ពុជា»។

កូនចៅប្រជារាស្រ្តទូទាំងប្រទេស និងមន្រ្តីរាជការ សូមថ្វាយព្រះរាជកុសលព្រះវិញ្ញាណក្ខន្ធព្រះបរមសព ព្រះករុណា ព្រះបាទសម្តេចព្រះ នរោត្តម សីហនុ សូមស្តេចយាងបដិសន្ឋិក្នុងព្រះបរមសុគតិភពកុំបីឃ្លាងឃ្លាតឡើយ៕

ដោយ ជឹម ណារី, សម្រួលផ្សាយ៖ dara

សូមអានបន្ត

ពលរដ្ឋងាយរងគ្រោះ និងរងផលប៉ះពាល់ដោយសារជំងឺកូវីដ១៩ ចំនួន១១៨គ្រួសារ ក្នុងស្រុកបន្ទាយមាស បានទទួលអំណោយមនុស្សធម៌កាកបាទក្រហមកម្ពុជា

 

កំពត៖ នៅព្រឹកថ្ងៃទី១០ ខែតុលា ឆ្នាំ២០២១

ឯកឧត្តម ជាវ តាយ អភិបាលខេត្តនិងជាប្រធានគណៈកម្មាធិការសាខាកាកបាទក្រហមកម្ពុជាខេត្តកំពតរួមដំណើរដោយសហការី បានអញ្ជើញចុះសួរសុខទុក្ខ និងនាំយកអំណោយមនុស្សធម៌កាកបាទក្រហមកម្ពុជា ដើម្បីផ្តល់ជូនប្រជាពលរដ្ឋងាយរងគ្រោះ និងរងផលប៉ះពាល់ដោយសារជំងឺឆ្លងកូវីដ១៩ ចំនួន ១១៨គ្រួសារ នៅក្នុងស្រុកបន្ទាយមាស ដែលពិធីនេះធ្វើឡើងនៅ វត្តសំរោង ក្នុងឃុំសំរោងលើ ស្រុកបន្ទាយមាសខេត្តកំពត។

មានប្រសាសន៍សំណេះសំណាលឯកឧត្តម ជាវ តាយអភិបាលខេត្តនិងជាប្រធានគណៈកម្មាធិការសាខាកាកបាទក្រហមខេត្ត បាននាំមកនូវការផ្ដាំផ្ញើសួរសុខទុក្ខដោយក្ដីនឹករលឹក

របស់សម្ដេចតេជោហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិតប៊ុនរ៉ានីហ៊ុនសែនប្រធានកាកបាទក្រហមកម្ពុជា ជូនចំពោះប្រជាពលរដ្ឋ នាឱកាសនោះ ។ ដែលជានិច្ចជាកាលសម្ដេចទាំងទ្វេ តែងតែគិតគូរ ជាប់ជានិច្ចពីសុខទុក្ខរបស់បងប្អូនប្រជាពលរដ្ឋ ទូទាំងប្រទេស ដែលជួបការលំបាក ខ្វះខាត មានជំងឺ ចាស់ជរា ស្ត្រី មេម៉ាយកូនច្រីនក្នុងបន្ទុក ជនងាយរងគ្រោះ និងជនរងគ្រោះក្នុងស្ថានភាពដោយសារជំងឺកូវីដ១៩ ព្រមទាំងប្រជាពលរដ្ឋដែលជួបគ្រោះមហន្តរាយផ្សេងៗគ្រប់ពេលវេលា ដោយមិនប្រកាន់ពូជសាសន៍ ពណ៌សម្បុរ ឬនិន្នាការនយោបាយ ហើយក៏មិនដែលទុកចោលឱ្យប្រជាពលរដ្ឋណាម្នាក់ស្លាប់ដោយសារដាច់ស្បៀងអាហារនិងគ្មានអាជ្ញាធរសមត្ថកិច្ចដឹងឮឬដោះស្រាយឡើយ។ ជាក់ស្តែងក្នុងអំឡុងពេលដែលពិភពលោក ក៏ដូចជាកម្ពុជាយើងទទួលរងនូវវិបត្តិការឆ្លងរីករាលដាលនូវជំងឺកូវីដ១៩ សម្តេចទាំងទ្វេរបានខិតខំប្រឹងប្រែង អស់កម្លាំងកាយចិត្ត ដើម្បីការពារសុខមាលភាពនិងអាយុជីវិតរបស់ប្រជាពលរដ្ឋគ្រប់រូប តាមរយៈការផ្ដល់សាច់ប្រាក់ជូនគ្រួសារប្រជាពលរដ្ឋក្រីក្រ និងបានការដាក់ចេញវិធានការសំខាន់ៗរួមនឹង បទបញ្ជា ក្នុងការធ្វើយុទ្ធនាការប្រយុទ្ធប្រឆាំងជំងឺឆ្លងកូវីដ១៩ ពិសេសការស្វែងរកវ៉ាក់សាំងយកមកចាក់ជូនប្រជាពលរដ្ឋ និងជំរុញប្រជាពលរដ្ឋគ្រប់រូបឱ្យទៅទទួលការចាក់វ៉ាក់សាំងឲ្យបានគ្រប់គ្នា ដើម្បីធ្វើយ៉ាងណាឱ្យមានភាពស៊ាំនឹងជំងឺកូវីដ១៩ក្នុងសហគមន៍ សំដៅឱ្យការរស់នៅតាមគន្លងថ្មី ឈានទៅរកការបើកឱ្យដំណើរប្រទេសជាធម្មតាឡើងវិញនាពេលខាងមុខដ៏ខ្លីនេះ។

ឯកឧត្តមជាវ តាយក៏បានក្រើនរំលឹកដល់ប្រជាពលរដ្ឋទាំងអស់ ត្រូវខិតខំយកចិត្តទុកដាក់ថែរក្សាអនាម័យសុខភាពឲ្យបានល្អ និងប្រឹងប្រែងប្រកបរបររកស៊ី បង្កបង្កើតផល ដើម្បីជួយសម្រាលជីវភាពឲ្យបានកាន់តែប្រសើរ នឹងត្រូវបន្តចូលរួមអនុវត្តន៍ឱ្យបាននូវវិធានសុវត្ថិភាពសុខាភិបាល ៣កុំ ៣ការពារឱ្យបានជាប់ជាប្រចាំ។

អំណោយដែលផ្តល់ជូនពលរដ្ឋទាំង ១១៨គ្រួសារ ក្នុងគ្រួសារៗទទួលបាន៖ អង្ករ២៥គីឡូ ត្រីខ១០កំប៉ុង ទឹកត្រី ១យួរ មី១កេស ម៉ាសក្រណាត់បោកទឹកប្រើបានចំនួន១០ និងថវិកាមួយចំនួនផងដែរ៕ ដោយ៖ មន្ទីរព័ត៌មានខេត្តកំពត សម្រួលផ្សាយដោយ៖ dara

សូមអានបន្ត

រដ្ឋមន្ត្រី ថោង ខុន៖ ក្នុងបរិបទនៃសេដ្ឋកិច្ចឌីជីថល បដិវត្តឧស្សាហកម្ម ៤.០ រួមចំណែកយ៉ាងសំខាន់ សម្រួល ការធ្វើដំណើរភ្ញៀវទេសចរ

  

(ភ្នំពេញ)៖ លោក ថោង ខុន រដ្ឋមន្ត្រីក្រសួងទេសចរណ៍ បានថ្លែងបញ្ជាក់ថា ស្ថិតនៅក្នុងបរិបទនៃសេដ្ឋកិច្ចឌីជីថល បដិវត្តឧស្សាហកម្ម ៤.០ បានចូលរួមចំណែក យ៉ាងសំខាន់ក្នុងការជួយសម្របសម្រួល ដល់ការធ្វើដំណើរ របស់ភ្ញៀវទេសចរទាំងទេសចរក្នុងស្រុក និងអន្តរជាតិ។

រដ្ឋមន្ត្រី ថោង ខុន បានថ្លែងបញ្ជាក់យ៉ាងដូចនេះនាព្រឹកថ្ងៃទី០៤ ខែតុលា ឆ្នាំ២០២១នេះ ក្នុងឱកាសអញ្ជើញជាអធិបតីក្នុងពិធីចុះហត្ថលេខាលើអនុស្សារណៈនៃការ យោគយល់គ្នារវាងក្រសួងទេសចរណ៍ជាមួយក្រុមហ៊ុន Wonderpass Technology ដើម្បីលើកកម្ពស់ការអភិវឌ្ឍន៍បច្ចេកវិទ្យាឌីជីថលក្នុងវិស័យទេសចរណ៍ ដោយមានការ ចុះហត្ថលេខារវាងលោក ថោង រដ្ឋសក្តិ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ និងលោក Frederic Proulx ស្ថាបនិកក្រុមហ៊ុន Wonderpass Technology តាមប្រព័ន្ធវីដេអូ និងមានការចូលរួមពីលោក ប៉ាក់ សុខុម រដ្ឋលេខាធិកាក្រសួងទេសចរណ៍ រួមទាំងមន្ត្រីក្រសួងជាច្រើនរូបទៀតផងដែរ។

លោករដ្ឋមន្ត្រី ថោង ខុន បានបន្ថែមថា ស្ថិតក្នុងដំណាក់កាលនៃវិបត្តិជំងឺកូវីដ-១៩នេះ ការវិវត្តន៍នៃសមត្ថភាព និងដំណោះស្រាយផ្នែកបច្ចេកវិទ្យាឌីជីថលក្នុងវិស័យ ទេសចរណ៍ ពិតជាមានសារៈសំខាន់ណាស់ ដោយក្រសួងទេសចរណ៍ក៏បានដាក់ចុះនូវយុទ្ធសាស្ត្រ«ទេសចរណ៍ឆ្លាតវៃ (SMART Tourism)» ដើម្បីជំរុញការសម្រួល ការធ្វើដំណើររបស់ភ្ញៀវទេសចរស្របតាមសភាពការណ៍ និងនិន្នាការទេសចរណ៍ថ្មីៗផងដែរ។

លោក ថោង រដ្ឋសកិ្ត បានឱ្យដឹងដែរថា ការចុះ MoUនេះ ដើម្បីផ្តល់ជាបទពិសោធន៍ និងភាពងាយស្រួលជូនដល់ភ្ញៀវទេសចរជាតិ និងអន្តរជាតិ ក្នុងការគ្រប់គ្រងតាមប្រព័ន្ធ online ដើម្បីធ្វើការសម្របសម្រួលភ្ញៀវរួមជាមួយគ្នាទាំងភ្ញៀវទេសចរក្នុងស្រុក និងអន្តរជាតិ ហើយការចូលរួមរបស់ក្រុមហ៊ុននេះ នឹងជំរុញបន្ថែមទៀតដល់ការអនុវត្ត យុទ្ធសាស្ត្ររបស់ក្រសួង ក្នុងការអភិវឌ្ឍន៍វិស័យវិទ្យាសាស្ត្រ បច្ចេកវិទ្យា និងនវានុវត្តន៍ ដែលជាផ្នែកមួយដ៏សំខាន់ក្នុងផែនទីចង្អុលផ្លូវស្តីពីវិទ្យាសាស្ត្រ បច្ចេកវិទ្យា និងនវានុវត្ត៍កម្ពុជាឆ្នាំ២០៣០។

លោក ថោង រដ្ឋសកិ្ត បានបន្ថែមថា ការចុះអនុស្សរណៈនេះក៏ជាការជំរុញវិស័យវិទ្យាសាស្ត្រ បច្ចេកវិទ្យា និងនវានុវត្ត៍ ក្នុងវិស័យទេសចរណ៍ នឹងគាំទ្រដល់ការគ្រប់គ្រង វិស័យទេសចរណ៍ លើកកម្ពស់អាជីវកម្មទេសចរណ៍ ក្នុងបរិបទ ប្រក្រតីភាពថ្មីឲ្យមានភាពធន់ ពង្រឹងសមត្ថភាពស្ថាប័ននិងបុគ្គលិកជំនាញជំរុញទីផ្សារ និងការផ្សព្វផ្សាយ ទេសចរណ៍ឌីជីថល ការលើកកម្ពស់ផលិតភាព និងពង្រឹងគុណភាពសេវាកម្ម នៅក្នុងដំណាក់កាលនៃផែនការស្តារវិស័យទេសចរណ៍ឡើងវិញរួមមាន៖ការគ្រប់គ្រងវិបត្តិ ក្នុងដំណាក់កាលទម្លាប់ថ្មី និងរៀបចំផែនការសម្រាប់ការស្ដារឡើងវិញឆ្នាំ២០២១, ការស្ដារឡើងវិញនៃវិស័យទេសចរណ៍កម្ពុជាក្រោយវិបត្តិជំងឺកូវីដ-១៩ ឆ្នាំ២០២២-២០២៣ និងការរៀបចំឆ្ពោះទៅកាន់អនាគតថ្មីនៃវិស័យទេសចរណ៍កម្ពុជា ឆ្នាំ២០២៤-២០២៥។

លោក Frederic Proulx បានបញ្ជាក់ថា តាមរយៈដំណោះស្រាយបច្ចេកវិទ្យាឌីជីថល Wonderpass ក្រុមហ៊ុននឹង ខិតខំជំរុញការផ្សព្វផ្សាយទេសចរណ៍ ក្នុងនិងក្រៅប្រទេស និងផ្តល់ភាពងាយស្រួលដល់ភ្ញៀវទេសចរមុនពេល និងអំឡុងពេលដំណើរកម្សាន្តនៅកម្ពុជា ដោយប្រើប្រាស់បច្ចេកវិទ្យាព័ត៌មាន ការទូរទាត់រហ័ស និងងាយស្រួល និងការគ្រប់គ្រងការទស្សនាផងដែរ ដែលនេះជាការធានាដល់ការពង្រឹងការប្រកួតប្រជែងទីផ្សារទេសចរណ៍ នៅតំបន់អាស៊ីផងដែរក្នុងដំណាក់ ស្តារឡើងវិញ នៃវិស័យទេស ចរណ៍កម្ពុជាផងដែរ។

សូមបញ្ជាក់ដែរថា អនុស្សារណៈនៃការយោគយល់គ្នានេះមានគោលបំណងសំខាន់ៗរួមមាន៖ ជំរុញការសិក្សាអភិវឌ្ឍន៍ ការអនុវត្ត និងវាយតម្លៃលើប្រព័ន្ធ វ៉នឌើរផាស ថេកណឡជី (Wonderpass Technology) ដើម្បីបង្កើនប្រសិទ្ធភាពក្នុងការទូទាត់រហ័ស និងងាយស្រួលក្នុងវិស័យទេសចរណ៍ ការរៀបចំនូវព្រឹត្តិការណ៍ទេសចរណ៍ និងកីឡាទេសចរណ៍កម្រិតជាតិ និងអន្តរជាតិនានា និងការគាំទ្រការទូទាត់រហ័សសម្រាប់កញ្ចប់ទស្សនកិច្ចទេសចរណ៍ចាក់វ៉ាក់សាំង, ពង្រឹងសមត្ថភាពមន្ត្រីក្រសួង ទេសចរណ៍លើផែនការអភិវឌ្ឍន៍ទេសចរណ៍ ការគ្រប់គ្រងទិន្នន័យទេសចរណ៍ ការកក់សេវាកម្ម និងការទូទាត់ចំណាយទេសចរ និងបច្ចេកទេសនៃការ គ្រប់គ្រង ព្រឹត្តិការណ៍ទេសចរណ៍តាមប្រព័ន្ធបច្ចេកវិទ្យាឌីជីថល និងសម្រួលដំណើរទេសចរ និងការផ្សព្វផ្សាយទេសចរណ៍ឌីជីថលរូបនីយកម្មទាំងក្នុងនិងក្រៅប្រទេសផងដែរ៕

សូមអានបន្ត